Аудан әкімі Нұрбақыт Молдахметұлы Теңізбаевтың 25 қазан – Республика күнімен аудан халқын құттықтауы
Аудан әкімі Нұрбақыт Молдахметұлы Теңізбаевтың
25 қазан – Республика күнімен аудан халқын құттықтауы
Құрметті де қадірменді аудан тұрғындары!
Сіздерді 25 қазан – Республика күнімен шын жүректен құттықтаймын!
Бұл – халқымыздың тарихындағы ерекше мәні бар айрықша күн. 1990 жылы дәл осы күні «Қазақ Кеңестік Социалистік Республикасының мемлекеттік егемендігі туралы» Декларация қабылданды. Осылайша, халқымыз өз болашағын өзі айқындайтын дербес мемлекет құру жолына түсті. Бұл – ел егемендігінің, тәуелсіздікке апарар алғашқы тарихи қадамның бастауы.
Республика күні – әрбір қазақстандықтың жүрегіне отансүйгіштік сезімін ұялататын, елдің өткеніне тағзым, бүгінгі жетістігіне шүкірлік етіп, болашаққа сеніммен қарауға жетелейтін ұлы мереке.
Тәуелсіздік жылдарында еліміз үлкен өзгерістер мен серпілістер кезеңін бастан өткерді. Елбасы мен Мемлекет басшысының сарабдал саясатының арқасында Қазақстан дамыған мемлекеттердің қатарына қосылып, экономикасы орнықты, халқы ынтымақты елге айналды. Қазіргі таңда елдің саяси тұрақтылығы мен қоғамдық келісімі – барша жетістігіміздің берік іргетасы.
Осы орайда, ауданымыздың да тыныс-тіршілігі мен әлеуметтік-экономикалық дамуы жылдан жылға жанданып келеді.
Бұл – баршамыздың бірлікте атқарған табанды еңбегіміздің нәтижесі.
Қадірлі жерлестер!
Сіздерге зор алғысымды білдіре отырып, әр отбасыға амандық, бақ-береке, елімізге тұрақтылық пен гүлдену тілеймін. Республика күні – әрдайым елдік пен бірліктің, татулық пен жаңғырудың мерекесі болсын!
Еліміз аман, жұртымыз тыныш, көк туымыз биік болғай!
