Ұрпаққа өнеге – ерлікке тағзым
Үстіміздегі жылы адамзат тарихындағы ең сұрапыл соғыстың – Ұлы Отан соғысының басталғанына 80 жыл толып отыр.
Бұл – тек тарихи дата ғана емес, бейбіт өмірдің, ел бірлігінің, ұлт рухының қаншалықты қымбат екенін ұғындыратын тағылымды кезең. Осы орайда, Кеген ауылында ел үшін жанын шүберекке түйіп, ерлікпен шайқасқан ардагерлердің есімі ардақталып, бірқатар көшелерге батырлардың аттары берілді.
Ұлы Отан соғысы ардагерлері Үмбетжан Нұрқазиев, Әлдербаев Молдан, Естенов Мұханбек, Сығаев Ыдырыс, Нұраділ Смағұлов, Нұрғали Жаңабаев және Данияр Сыдықов сынды ел қорғаған ерлердің есімі ел есінде қалуы үшін арнайы тақтайшалар орнатылып, ашылу салтанаты өткізілді. Бұл – елдің тәуелсіздігі мен еркіндігі жолында жанын қиған қаһармандарға көрсетілген зор құрмет.
Салтанатты шараға аудан әкімі Нұрбақыт Теңізбаев, мемлекет және қоғам қайраткері, “Еңбек Қызыл Ту”, “Құрмет” ордендерінің иегері Данышпанов Бексырға, аудандық мәслихат төрағасы Нұғман Алмасбек, қоғам қайраткерлері Жаңабаев Қуанышбек, Байсабаев Сағат, зейнеткер Әлмешов Әлмахат, Даниярова Зәуре, кәсіпкер Қуаныш Мұханбеков сынды ел ардақтылары қатысып, көше атауының ашылу салтанатында лентасын қиды, аудан басшысы Нұрбақыт Молдахметұлы: “Мемлекет басшысы мен Үкіметтің тапсырмасына сәйкес еліміздің барлық өңірлерінде Ұлы Жеңістің 80 жылдығын кеңінен атап өтіп, соғыс ардагерлерінің ерлігі мен есімдерін ұлықтау бағытында ауқымды іс-шаралар өткізілуде. Сол игі бастаманың аясында ауданымызда да батыр бабаларымыздың есімін мәңгі есте қалдырып, келешек ұрпаққа дәріптеу мақсатында көшелерге ат беру жұмыстары жүргізілуде. Бұл өткенге тағзым, ерлерге құрмет, елдік пен бірліктің белгісі болмақ”,-деді.
Ардагерлерге арналған естелік шара барысында зейнеткер Әбдикеримова Шаруан, қоғам қайраткері Кенжебеков Өмірғали және басқа да ақсақалдар ақ батасын беріп, бейбіт өмірдің бағасын ұрпақ жадында сақтау керектігін айтты.
Ұлы Отан соғысы – адамзат тарихындағы ең сұрапыл соғыстардың бірі болды. Сол зұлмат жылдар батыр бабаларымыз майдан даласында ерлік көрсетіп, отан қорғауда асқан батылдық танытты. Мыңдаған азамат майданға аттанып, елдің тәуелсіздігі мен бейбіт өмірі үшін жанын қиды. Ал тылда қалған аналар мен балалар, еңбек адамдары майдан үшін аянбай еңбек етті.
Бұл – өткенге тағзым, ерге құрмет, болашаққа берік сенім мен аманат. Көшелерге батырлар есімін беру – жай ғана рәсім емес, әрбір жүрекке Отан алдындағы парызды сіңірудің жарқын үлгісі.
Осындай тағылымды істер арқылы жас буын батырлықтың, елге деген махаббаттың не екенін терең түсініп өсері анық.
Бүгінде біз жеңісті жақындатқан ардагерлеріміздің алдында бас иеміз. Олардың жанқиярлық ерлігі мен Отанға деген шексіз сүйіспеншілігі – еліміздің бейбіт болашағының негізі. Ұлы Отан соғысының 80 жылдығы аясында ардагерлерге тағзым етіп, олардың есімдерін мәңгілікке сақтау- әрбір ұрпақтың парызы.
Шара соңы аудандық мәдениет үйі өнерпаздарының концерттік бағдарламасына ұласты.
