Қарты бар ел – қазыналы ел

1 қазан – Халықаралық қарттар күні. Бұл күн – елінің еңсесін тіктеген, ұлттың ұйытқысы болған, саналы ғұмырын ұрпақ тәрбиесіне арнаған абыз ақсақалдар мен ақ жаулықты аналарымызға деген шексіз құрметтің жарқын көрінісі.
Осыған орай, аудан әкімінің бастамасымен «Қарты бар елдің – қазынасы бар» атты тағылымды мерекелік кеш өтті. Сарытау кафесінде жайылған ақ дастархан – ауданның ардақты қарияларына арналды. Бұл– құрметтің үлкені, тағзымның биігі.
Қарттарға құрмет – елге құрмет. Мерекелік шарада аудан әкімі Нұрбақыт Молдахметұлы Теңізбаев қазыналы қарияларды айтулы мерекемен құттықтап:
– «Қариясы бар елдің – қазынасы бар» дейді халқымыз. Бүгінгі дамыған мемлекет, өркендеген өңір- сіздердің сарабдал ақыл- кеңестеріңіз бен сіңірген еңбектеріңіздің жемісі. Жастар сіздерден үлгі алады. Ел шежіресі, ұрпақтың темірқазығы, еліміздің бірлігі мен берекесінің ұйытқысы – ақсақалдарымыз бен аналарымыз аман болсын! – деген ізгі лебізін білдірді.
Өнегелі кеш-өнегелі ұрпаққа,- демекші шара барысында аудандық мәслихат хатшысы Алмасбек Нөкербан, аудандық ақсақалдар кеңесінің төрағасы Сабыр Досымбеков, кәсіподақ төрағасы Нұрлыбай Көпжасарұлы, окург ақсақалдар алқасынан Болат Таубалдиев тағыда басқа көнекөз қарияларымыз сөз сөйлеп, ақ баталарын берді. Ал ауданның Құрметті азаматы, ардақты ана Нағима Таласбаева жүрекжарды тілегін білдіріп, «Қазақтай ел қайда?» әнін әуелете шырқап, көпшіліктің ыстық ықыласына бөленді.
Мерекелік кеште Жұмыспен қамту және әлеуметтік бағдарламалар бөлімі мекемесінің қыздары «Менің қос бәйтерегім» әні әрлеп, әсерлі күйге бөлесе, кеш барысында салт-дәстүр мен мақал-мәтелдерге қатысты қызықты сұрақ-жауап ойыны ойнатылып, қариялар белсенділік танытты.
Ізгілікке толы кеште ән мен жыр, тілек пен бата қатар өріліп, ұлттық құндылықтар, үлкенге құрмет, кішіге ізет, ұрпақтар сабақтастығы терең насихатталды. Ақсақалдардың өнегелі әңгімелері мен аналардың ақ батасы жастарға мол тағылым сыйлады.
Мерекелік шара соңында аудан әкімдігі тарапынан қарияларға арнайы сый-сияпат табыс етілді. Қариялар елеп-ескеріп, құрмет көрсеткен аудан басшылығына ризашылықтарын білдірді.
Қарттар- біздің өткініміз ғана емес, бүгініміз бен ертеңіміздің бағдаршамы.
Сол бағдаршамның жарығы ешқашан сөнбесін, қарияларымыз аман болсын,- дестік.

Лаура Қарасартова,
Суреттерді түсірген:
Мира БЕЙБІТҚЫЗЫ.