Журналистика жампозы

Кереге таулы Кеген өңірі-өнердің мөлдір бұлағы десек, оның ішінде Қарқара ауылы ақындықтың туын тіккен шайырлар Отаны.
Солардың қатарында, өзінің саналы ғұмырын журналистика саласына арнап келе жатқан қаламы қарымды журналист – жазушы,
Қазақстанның мәдениет қайраткері Нұрғожаев Жақыпжан Мысабекұлының есімі елімізге етене таныс. Жақыпжан Мысабекұлы 1946 жылы 13 наурызда Қарқара ауылының Тасбұлақ ауылында дүниеге келген. Алматыдағы Қазақ мемлекеттік университетін 1975 жылы (қазіргі Әбу Насыр әлФараби атындағы Қазақ ұлттық университеті) бітірген. Республикамыздағы аса беделді осы бір жоғары оқу орнында танымал тұлғалардың алдын көрген Жақыпжан Нұрғожаев еңбек жолын 1975 жылы «Лениншіл жас» газетінен
(қазіргі «Жас Алаш») тілші болып бастап, бөлім меңгерушісі қызметіне дейін көтерілді. Бас редактор Сейдахмет Бердіқұловтың
ұстаханасынан ұшқыр қаламын шыңдап, 1982-1987 жылдары Шелек аудандық «Еңбек туы» газетінің редакторы, 1987-1994 жылдары Республика баспасөзге көмек көрсету қорының президенті болды. 1998 жылдан облыстық «Жетісу» газетінің бас редакторы болып, қызметін абыроймен атқарып, құрметті еңбек демалысына шықты. Бүгінде Республикалық «Мұқағали» журналының бас редакторы. Айта кету керек, Хантәңірінің мұзбалағы, ақиық ақын Мұқағали Мақатаевтың шығармашылығын
зерттеу ауқымын кеңейту мақсатында Жақыпжан ағаның жетекшілігімен ашылған «Мұқағали» журналы бүгінде мұқағалитануға тың арна салған көпшіліктің сүйікті басылымына айналды. Рухани інісі, ақын Батық Мәжитұлы екеуі бірлесіп, осы басылымның бағын жандырды, ақын тұлғасын жан-жақты сомдауға өлеңсүйер қауымды жұмылдырды. Бар ғұмырын қазақ журналистикасына арнап, соның ішінде ғасырдан асқан «Жетісу» газетін жиырма жыл басқарып, байсалды басшы, Ж урналистика ампозы қарымды қаламгер, жалынды журналист бола білді. Еліміздегі бірқатар басылымдарда журналистік тәжірибесін толықтырып, қаламгерлік
қолтаңбасын қалдырды. Өзі басшылық жасаған жылдарда Алматы облыстық «Жетісу» газеті қоғамдағы толғақты мәселелеріне, ел тағдырына, өңірдің өркендеуіне қатысты озық ой, байыпты байлам айтатын салиқалы баспасөздің бірі болды. Осылайша ол
егемен еліміздегі бірқатар мемлекеттік және тәуелсіз басылымдардың қалыптасуына сүбелі үлес қосып жүрген қаламы қарымды, жампоз журналист.
Иеленген марапаттары да жетерлік. Жақыпжан Нұрғожаев ҚР Президенті жанындағы Ұлттық Кеңестің және Қазақстан Жазушылар одағының мүшесі, «Құрмет» орденінің иегері. ҚР Тұңғыш Президентінің Алғыс хаттары, Алматы облысының әкімінің Құрмет грамотасымен бірнеше мәрте марапатталған. Қазақ әдебиетіне, журналистикасына және мұқағалитану ғылымына қосқан ерен еңбегі үшін Жақыпжан ағамыз Қазақстанның Құрметті журналисі, Қазақстанның Мәдениет қайраткері, Алматы облысының және Кеген, Райымбек, Еңбекшіқазақ аудандарының Құрметті азаматы атанды. Шығармашылық жұмысын журналистикадан бастаған Жақыпжан Мысабекұлы бүгіндері жазушылыққа біржола бет бұрып, оқырманын тынысы кең, табиғаты бөлек туындылармен
қуантуда. Қаламгер қаламынан «Парасат жолы», «Көксеңгір-Қайыңдының бойтұмары», «Замана сарыны», «Жетісу жылнамасы», ақиық ақын Мұқағалиға арналған «Тәңіртаудың қыраны», «Жүрегі оның жанартау» атты көптеген кітаптары оқырман көңілінен шығып, ыстық ықыласына бөленді. Осыдан бес жыл бұрын, Жақыпжан ағаның 75 жылдық мерейтойы «Жетісудың Жақыпжаны,
Қарқараның асыл жаны!» деген атпен аудандық Мәдениет үйінде өз деңгейінде, салтанатты түрде аталып өтті.
Жүсіп Баласағұн айтады: «Жанды сөздің жалынын білім маздатады». Жақыпжан аға жастайынан осы тәмсілді терең ұғынса керек.
Қаламгердің ол сенімі алдамады, олай дейтін себебіміз, өзінің 75 жылдық мерейтойының қарсаңында жазған «Кең дүние, төсіңді аш, мен келемін» деген Мұқағали ақынның көзін көрген қаламгерлермен, өнер адамдарымен жасаған сыр-сұхбаттары және көлемді әңгімесі енген кітабы биыл Қазақстан Жазушылар Одағының дәстүрлі жыл қорытындысының негізінде Халықаралық «Алаш» әдеби сыйлығына ие болды. Пайда ойламай, ар ойлайтын, ақпейіл де ақжарқын әзіз әріптесімізді аудандық қоғамдық-саяси, әлеуметтік-экономикалық «Қарқара» газеті ұжымының атынан Жақыпжан Мысабекұлын тағы бір белесті бағындыруымен құттықтап, адами һәм қаламгерлік ғұмырының ұзақ болуын тілейміз!
Сіздің қазақ журналистикасындағы жарқын ізіңіз-кейінгі толқын тілшілерге үлкен мектеп, тағылымды үлгі. Қашанда қаламының қарымды болуына, ойлы оқырмандарына деген ыстық ықыласы мен жауапкершілік сезімінің еселене түсуіне ізгі ниетке толы тілектестігімізді білдіргіміз келеді. Ғұмыр жасыңыз жүзге жетіп, жазар әдеби көркем дүниелеріңіз көбейе берсін!

Дәурен ЕРМЕКБАЙ,
ҚР Журналистер Одағының мүшесі