Жетісуда 1,1 млрд. теңгеге демалыс базалары салынады
Аламты облысы табиғаты көз тартар көрікті мекен. Жетісу өлкесі туристік нысандарға бай. Сол себепті, бұл аймаққа туристер ағылып келеді. Алайда, пандемияға байланысты былтыр аса жоғары көрсеткіш тіркеле қоймады. Салдарынан, келуші туристер саны 42 пайызға төмендеген. Дегенмен, туризм саласы тұралап қалған жоқ. Соңғы жылдардағы ішкі туризмнің дамуы оң нәтиже көрсетіп отыр. Сәйкесінше, келушілерге қызмет көрсететін нысан саны 803-ке жеткен жайы бар.
2020 жылдың қорытындысы бойынша Алматы облысында туризм саласындағы негізгі капиталға салынған инвестициялар 21,0 млрд.теңгені құрады, бұл республикалық көлемнің 14,5% – ын құрайды. Оның ішінде, 2020 жылы облыс картасында 24 жаңа нысан пайда болып, осы салада еңбек еткен халық саны – 27 мыңға жетті.
2021 жылы инфраструктуралық жобаларды іске асыруға мемлекеттік бюджет қаражаты есебінен 29,2 млд. теңге бөлінуі көзделген. Сонымен қатар, 171 жұмыс орнын құрумен құны 1,4 млрд.теңгеге 10 инвестициялық жоба пайдалануға беріледі.
«”Ой-Қарағай” және “Ақ бұлақ” тау курорттарын дамытудың Жол карталары бекітілді. 2020 жылы тау кластері туризмінің көліктік, инженерлік және “жұмсақ” инфрақұрылымын дамыту үшін жалпы сомасы 10 млрд.теңгеге жобалар іске асырылды. “Ой-Қарағай” және “Ақ бұлақ” курорттарына дейінгі, сондай-ақ Шарын шатқалы, Көлсай көлдері мен Тұзкөл көлінің топ туристік көрікті жерлеріне дейінгі жолдарды жөндеу аяқталды»,-деді Алматы облысы туризм басқармасының басшысы Жанар Алчимбаева.
Айта кетерлігі, жеке инвестицияларды тарту есебінен жалпы сомасы 1,5 млрд.теңгеге 9 туризм нысаны пайдалануға берілді. Туризм саласын туралауда көрікті мекенге апарар күре жолдың сапасын жақсарту мәселесіде назардан тыс қалмаған.
Биыл Қайыңды көлі мен Құрмет шатқалындағы “Көлсай көлдері” ұлттық саябағындағы жолдарға жалпы сомасы 2,8 млрд.теңге жөндеу жұмыстары басталады.
Сонымен қатар, жеке инвесторларды тарта отырып, Қарасай, Ұйғыр және Еңбекшіқазақ аудандарында жалпы сомасы 1,1 млрд.теңгеге қонақ үй кешендері мен демалыс базаларын салу жоспарлануда.
Медициналық туризмді жандандыру ісі де қолға алынған. Алакөл, Сасықкөл, Жалаңашкөл және Балқаш, Рай көлдерінің, ыстық су көздерінің суы мен балшығына зерттеу жүргізіліп, инвесторлар тарту жұмысы жолға қойылуда.
